# ಮಾಂಸಕ್ಕಾಗಿ ಬಾತುಕೋಳಿ ಕತ್ತರಿಸಿದಾಗ ದೊರಕಿತು ಲಕ್ಷ ಲಕ್ಷ ಮೌಲ್ಯದ ಚಿನ್ನ

- Link: https://hosakannada.com/news/gold-worth-lakhs-found-while-slaughtering-duck-for-meat/
- Published: 2026-03-06T15:49:02+00:00
- Author: ಹೊಸಕನ್ನಡ ನ್ಯೂಸ್

ಬೆಂಗಳೂರು: ಮಾಂಸಕ್ಕಾಗಿ ಬಾತುಕೋಳಿಯನ್ನು ಕತ್ತರಿಸಿದಾಗ ಅದರ ಹೊಟ್ಟೆಯಲ್ಲಿ ಬರೋಬ್ಬರಿ 1.6 ಲಕ್ಷ
ರೂ. ಮೌಲ್ಯದ ಚಿನ್ನದ ತುಣುಕುಗಳು ಪತ್ತೆಯಾಗಿರುವ ಘಟನೆಯೊಂದು ಚೀನಾದ ಹೂನಾನ್‌ ಪ್ರಾಂತ್ಯದ ಲಾಂಗ್‌ಹುಯಿ
ಕೌಂಟಿಯಲ್ಲಿ ನಡೆದಿದೆ.

Sponsored

ಲಿಯು ಎನ್ನುವ ವ್ಯಕ್ತಿಯೊಬ್ಬ ಮಾಂಸಕ್ಕಾಗಿ ಬಾತುಕೋಳಿಯನ್ನು ಕತ್ತರಿಸಿದ್ದು, ಅದನ್ನು ಕ್ಲೀನ್‌ ಮಾಡುತ್ತಿದ್ದ.
ಈ ವೇಳೆ ಬಾತುಕೋಳಿಯ ಹೊಟ್ಟೆಯೊಳಗೆ ಹೊಳೆಯುವ ವಸ್ತುಗಳು ಕಂಡು ಬಂದಿದ್ದು, ಸಂಶಯಗೊಂಡ ಲಿಯು ಅದನ್ನು
ಪರೀಕ್ಷೆ ಮಾಡಿದಾಗ ಅವು ಚಿನ್ನದ ತುಣುಕುಗಳು ಎಂದು ಖಚಿತವಾಯಿತು. ಇವುಗಳು ಒಟ್ಟು 10 ಗ್ರಾಂ ಇತ್ತು.

Advertisement

Advertisement

ಲಿಯು ಮನೆ ಪಕ್ಕನೇ ಚೆನ್‌ಶುಯಿ ನದಿ ಹರಿಯುತ್ತದೆ. ಈ ನದಿಯು ಚಿನ್ನದ ನಿಕ್ಷೇಪಗಳಿಗೆ ಹೆಸರುವಾಸಿಯಾಗಿತ್ತು.
ಲಿಯು ಸಾಕಿದ್ದ ಬಾತುಕೋಳಿಗಳು ಆಹಾರಕ್ಕಾಗಿ ನದಿಯ ದಡದಲ್ಲಿ ಮಣ್ಣನ್ನು ಕೆರೆಯುತ್ತಿದ್ದಾಗ, ಮಣ್ಣಿನಲ್ಲಿದ್ದ
ಸಣ್ಣ ಚಿನ್ನದ ಕಣಗಳನ್ನು ಆಹಾರದೊಂದಿಗೆ ನುಂಗಿರಬಹುದು ಎಂದು ನಂಬಲಾಗಿದೆ.

ಲಿಯು ಹೇಳುವ ಪ್ರಕಾರ ಈ ಭಾಗದ ಹಳ್ಳಿಗರಿಗೆ ಬಾತುಕೋಳಿಗಳ ಹೊಟ್ಟೆಯಲ್ಲಿ ಚಿನ್ನ ದೊರಕಿದ ಉದಾಹರಣೆಗಳಿದೆ.
ಆರನೇ ಶತಮಾನದ ಟ್ಯಾಂಗ್‌ ರಾಜವಂಶದ ಕಾಲದಲ್ಲೂ ಬಾತುಕೋಳಿ ಮತ್ತು ಹಂಸಗಳ ಮಲದಿಂದ ಚಿನ್ನದ ಕಣಗಳನ್ನು
ಸಂಗ್ರಹಿಸುವ ಪದ್ಧತಿ ಇತ್ತು ಎಂದು ಇತಿಹಾಸದ ಪುಟಳು ಹೇಳುತ್ತದೆ ಎಂದು ವರದಿಯಾಗಿದೆ.

ಚೀನಾದ ಕಾನೂನಿನ ಅನುಸಾರ ಭೂಮಿಯ ಅಡಿಯಲ್ಲಿ ಸಿಗುವ ಯಾವುದೇ ಸಂಪನ್ಮೂಲ ಸರಕಾರಕ್ಕೆ ಸೇರಿದ್ದು. ಆದರೆ
ಪಕ್ಷಯ ಹೊಟ್ಟೆಯಲ್ಲಿ ಸಿಕ್ಕ ಚಿನ್ನದ ಮಾಲೀಕತ್ವ ಯಾರಿಗೆ ಹೋಗಬೇಕು ಎನ್ನುವುದು ಇನ್ನೂ ಯಕ್ಷ ಪ್ರಶ್ನೆಯಾಗಿದೆ.
ಅಧಿಕಾರಿಗಳು ಕೂಡಾ ಈ ಕುರಿತು ತೀರ್ಮಾನ ಕೈಗೊಳ್ಳುವುದು ಕಷ್ಟ ಎಂದು ಅಭಿಪ್ರಾಯಪಟ್ಟಿದ್ದಾರೆ.

Advertisement