# IT Raid : ಕಾರಿನಲ್ಲಿ ₹9 ಕೋಟಿ ನಗದು ಜಪ್ತಿ; ಜ್ಯುವೆಲ್ಲರಿ ಮಾಲೀಕನ ಮನೆಯಲ್ಲಿ ₹1.3 ಕೋಟಿ ಪತ್ತೆ

- Link: https://hosakannada.com/news/electronic-city-rs-9-crore-cash-seized-jewellery-owner-it-investigation/
- Published: 2026-08-21T10:29:03+00:00
- Author: ಹೊಸಕನ್ನಡ ನ್ಯೂಸ್

**ಬೆಂಗಳೂರು: ನಗರದಲ್ಲಿ ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಭಾರಿ ಪ್ರಮಾಣದ ನಗದನ್ನು ಎಲೆಕ್ಟ್ರಾನಿಕ್
ಸಿಟಿ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಕಾರಿನಲ್ಲಿ ಸೂಕ್ತ ದಾಖಲೆಗಳಿಲ್ಲದೆ ಸಾಗಿಸಲಾಗುತ್ತಿದ್ದ 
₹9 ಕೋಟಿ ನಗದು ಪತ್ತೆಯಾಗಿದ್ದು, ಪ್ರಕರಣದ ತನಿಖೆ ಇದೀಗ ಆದಾಯ ತೆರಿಗೆ ಇಲಾಖೆ ಕೈಗೆ ಸೇರಿದೆ.**

Sponsored

> [ನಕಲಿ ಔಷಧಿ ಜಾಲಕ್ಕೆ 5 ರಾಜ್ಯಗಳ ಲಿಂಕ್‌; ತನಿಖೆಗೆ 5 ತಂಡ ರಚನೆ](https://hosakannada.com/news/fake-medicine-network-five-states-investigation/)
> Advertisement
> Advertisement

ಆಗಸ್ಟ್ 18ರಂದು ಎಲೆಕ್ಟ್ರಾನಿಕ್ ಸಿಟಿಯ ವೀರಸಂದ್ರ ಸಿಗ್ನಲ್ ಬಳಿ ಈ ಕಾರ್ಯಾಚರಣೆ ನಡೆದಿದೆ. ಐಟಿ
ಅಧಿಕಾರಿಗಳಿಂದ ಲಭಿಸಿದ ಖಚಿತ ಮಾಹಿತಿಯ ಮೇರೆಗೆ ಪೊಲೀಸರು ಕಾರನ್ನು ತಡೆದು ಪರಿಶೀಲನೆ ನಡೆಸಿದಾಗ,
ದಾಖಲೆಗಳಿಲ್ಲದೆ ಸಾಗಿಸಲಾಗುತ್ತಿದ್ದ ಕೋಟ್ಯಂತರ ರೂಪಾಯಿ ನಗದು ಪತ್ತೆಯಾಗಿದೆ. ಹಣದ ಜತೆಗೆ ಕಾರನ್ನು
ವಶಕ್ಕೆ ಪಡೆದ ಪೊಲೀಸರು, ನಗದು ಯಾರಿಗೆ ಸೇರಿದ್ದು ಎಂಬ ಬಗ್ಗೆ ವಿಚಾರಣೆ ನಡೆಸಿದ್ದಾರೆ. ಪ್ರಾಥಮಿಕ
ತನಿಖೆಯಲ್ಲಿ ಈ ಹಣ ತಮಿಳುನಾಡಿನ ತೂತುಕುಡಿಯ ಸಿಂಧು ಜ್ಯುವೆಲ್ಲರ್ಸ್ ಮಾಲೀಕ ಸಚಿನ್‌ಗೆ ಸೇರಿದ್ದು
ಎಂಬ ಮಾಹಿತಿ ಲಭ್ಯವಾಗಿದೆ. ಬಳಿಕ ಸಚಿನ್‌ನನ್ನು ಆದಾಯ ತೆರಿಗೆ ಅಧಿಕಾರಿಗಳಿಗೆ ಹಸ್ತಾಂತರಿಸಲಾಗಿದೆ.

> [ನಕಲಿ ಔಷಧಿ ಜಾಲಕ್ಕೆ 5 ರಾಜ್ಯಗಳ ಲಿಂಕ್‌; ತನಿಖೆಗೆ 5 ತಂಡ ರಚನೆ](https://hosakannada.com/news/fake-medicine-network-five-states-investigation/)

**ನಿವಾಸದಲ್ಲೂ ₹1.3 ಕೋಟಿ ಪತ್ತೆ**

ಸಚಿನ್ ವಿಚಾರಣೆ ಬಳಿಕ ಐಟಿ ಅಧಿಕಾರಿಗಳು ಅವರ ನಿವಾಸದಲ್ಲೂ ಪರಿಶೀಲನೆ ನಡೆಸಿದ್ದಾರೆ. ಈ ವೇಳೆ ₹1.3
ಕೋಟಿ ನಗದು ಪತ್ತೆಯಾಗಿದೆ ಎನ್ನಲಾಗಿದೆ. ಕಾರಿನಲ್ಲಿ ಜಪ್ತಿಯಾದ ₹9 ಕೋಟಿ ಹಾಗೂ ನಿವಾಸದಲ್ಲಿ ಪತ್ತೆಯಾದ
₹1.3 ಕೋಟಿ ಸೇರಿ ಒಟ್ಟು ₹10.3 ಕೋಟಿ ಹಣದ ಮೂಲದ ಬಗ್ಗೆ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ.
ಹಣಕ್ಕೆ ಸಂಬಂಧಿಸಿದ ದಾಖಲೆಗಳು, ವಹಿವಾಟಿನ ವಿವರಗಳು ಹಾಗೂ ನಗದು ಸಾಗಿಸಲಾಗುತ್ತಿದ್ದ ಉದ್ದೇಶದ ಕುರಿತು
ತನಿಖೆ ಮುಂದುವರಿದಿದೆ. ಹಣದ ಮೂಲ ಹಾಗೂ ಅದರ ಸಾಗಣೆಯ ಹಿಂದಿನ ಉದ್ದೇಶ ಸ್ಪಷ್ಟವಾದ ಬಳಿಕ ಪ್ರಕರಣದ
ಮುಂದಿನ ಕ್ರಮದ ಬಗ್ಗೆ ಆದಾಯ ತೆರಿಗೆ ಅಧಿಕಾರಿಗಳು ನಿರ್ಧರಿಸಲಿದ್ದಾರೆ.

> [ನಕಲಿ ಔಷಧಿ ಜಾಲಕ್ಕೆ 5 ರಾಜ್ಯಗಳ ಲಿಂಕ್‌; ತನಿಖೆಗೆ 5 ತಂಡ ರಚನೆ](https://hosakannada.com/news/fake-medicine-network-five-states-investigation/)

Advertisement