# ಆಂಬುಲೆನ್ಸ್ ನಲ್ಲೇ ಡ್ರಗ್ಸ್ ಸಾಗಾಟ – ‘ಬೆಳ್ತಂಗಡಿ ಹೀರೋ’ ಮುಖವಾಡ ಬಯಲು!!

- Link: https://hosakannada.com/news/drug-trafficking-in-an-ambulance-belthangadi-hero-exposed/
- Published: 2026-07-27T08:44:55+00:00
- Author: ಹೊಸಕನ್ನಡ ನ್ಯೂಸ್

ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿಯಲ್ಲಿ ಜಲೀಲ್ ಬಾಬಾ ಎಂದರೆ ತಿಳಿಯದವರಿಲ್ಲ. ಯಾಕೆಂದರೆ ಆತ ಶರವೇಗದ
ಆಂಬುಲೆನ್ಸ್ ಚಾಲಕ. ಅತೀ ವೇಗದಲ್ಲಿ ಆಂಬುಲೆನ್ಸ್ ಓಡಿಸುತ್ತಿದ್ದ ಕಾರಣಕ್ಕೆ ಹಾಗೂ ಉಚಿತ ಸೇವೆ ಅಂತಾ
ಸಮಾಜ ಸೇವೆಯ ಮಾಡುತ್ತ ಇಡೀ ತಾಲೂಕಲ್ಲೇ ಹೀರೋ ಆಗಿದ್ದ. ಇದರ ಜೊತೆಗೆ. ಆದರೀಗ ಹೀರೋ ಮುಖವಾಡ ಕಳಚಿ
ಬಿದ್ದಿದ್ದು, ಈ ಹೀರೋ ಆಂಬುಲೆನ್ಸ್‌ನಲ್ಲೇ ಡ್ರಗ್ಸ್ ಸಾಗಾಟ ಮಾಡುತ್ತಿದ್ದ ಎಂಬ ಭಯಾನಕ ಸತ್ಯ ಬಯಲಾಗಿರುವ
ಬಗ್ಗೆ ಮಾಧ್ಯಮಗಳು ವರದಿ ಮಾಡಿವೆ.

Sponsored

ಹೌದು, ತನ್ನ ಆಂಬುಲೆನ್ಸ್ ಮೂಲಕವೇ ಜನರಿಗೆ ಹತ್ತಿರವಾಗಿದ್ದ ಜಲೀಲ್ ಬಾಬಾ, ಜೀವ ಉಳಿಸೋ ಆಂಬುಲೆನ್ಸ್​
ನ್ನೇ ತನ್ನ ಡ್ರಗ್ಸ್ ಜಾಲದ ಅಡ್ಡೆ ಮಾಡಿಕೊಂಡಿರೋದು ಬಯಲಾಗಿದ್ದು, ಆತನ ಮುಖವಾಡ ಕಳಚಿ ಬಿದ್ದಿದೆ.
ಬಾಗಲಕೋಟೆಯಲ್ಲಿ ಸಿಕ್ಕಿಬಿದ್ದ ಬರೋಬ್ಬರಿ ಐದೂವರೆ ಕೋಟಿ ರೂಪಾಯಿ ಮೌಲ್ಯದ ಎಂಡಿಎಂಎ ಡ್ರಗ್ಸ್ ನೆಟ್‌ವರ್ಕ್‌ನಲ್ಲಿ
ಇದೆ ಜಲೀಲ್ ಬಾಬಾ ಹೆಸರು ಪ್ರಮುಖವಾಗಿ ಕೇಳಿಬರುತ್ತಿದ್ದು, ಪ್ರಕರಣ ಬಯಲಾಗುತ್ತಿದ್ದಂತೆ ಮೊಬೈಲ್ 
ಸ್ವಿಚ್ ಆಫ್ ಮಾಡಿಕೊಂಡು ಆರೋಪಿ ತಲೆಮರೆಸಿಕೊಂಡಿದ್ದಾನೆ.

Advertisement

Advertisement

ಬಂಡವಾಳ ಬಯಲಾಗಿದ್ದು ಹೇಗೆ?

ಕಳೆದ ಜೂನ್ 25ರಂದು ಮಂಗಳೂರು ಸಿಸಿಬಿ ಪೊಲೀಸರು ಮಂಗಳೂರಿನ ಕುಳಾಯಿಗುಡ್ಡೆ ಬಳಿ ದಾಳಿ ನಡೆಸಿ, ಅಣ್ಣಪ್ಪ
ಸ್ವಾಮಿ ಅಲಿಯಾಸ್ ಮನು ಎಂಬುವನಿಂದ 1.50 ಲಕ್ಷ ಮೌಲ್ಯದ ಎಂಡಿಎಂಎ ವಶಪಡಿಸಿಕೊಂಡಿದ್ದರು. ಈತನನ್ನು
ವಿಚಾರಣೆ ನಡೆಸಿದಾಗ ದೆಹಲಿಯಿಂದ ಎಂಡಿಎಂಎ ಡ್ರಗ್ಸ್ ಖರೀದಿಸಿ ಬೆಂಗಳೂರು ಮೂಲಕ ಕರಾವಳಿಗೆ ತರುತ್ತಿದ್ದ
ಜಾಲದ ಬಗ್ಗೆ ಮಾಹಿತಿ ಲಭಿಸಿತ್ತು. ಇದರ ಬೆನ್ನಲ್ಲೇ ಜುಲೈ 15ರಂದು ಬಾಗಲಕೋಟೆಯ ಹುನಗುಂದದ ಲಾಡ್ಜ್‌
ಒಂದರ ಮೇಲೆ ದಾಳಿ ನಡೆಸಿದ ಪೊಲೀಸರು, 5.196 ಕೆಜಿ ತೂಕದ, 5.50 ಕೋಟಿ ರೂ. ಮೌಲ್ಯದ ಎಂಡಿಎಂಎ ವಶಪಡಿಸಿಕೊಂಡಿದ್ದರು.
ಮುಖ್ಯ ಡೀಲರ್​ಗಳಾದ ಬೆಳ್ತಂಗಡಿಯ ಇಂದಬೆಟ್ಟುವಿನ ಮೊಹಮ್ಮದ್ ಅಲ್ತಾಫ್, ಉಜಿರೆ ಹಳೆಪೇಟೆಯ ಮೊಹಮ್ಮದ್
ಮುಸ್ತಫಾ ಹಾಗೂ ಅಲ್ಫಾಜ್ ಎಂಬುವರನ್ನು ಸೆರೆಹಿಡಿದಿದ್ದರು.

ಬಂಧಿತ ಆರೋಪಿಗಳನ್ನು ಇನ್ನಷ್ಟು ಡ್ರಿಲ್ ಮಾಡಿದಾಗ ಬೆಳ್ತಂಗಡಿಯ ಜಲೀಲ್ ಬಾಬಾ ಕೈವಾಡದ ಬಗ್ಗೆ ಬಾಯಿ
ಬಿಟ್ಟಿದ್ದರು. ಆರೋಪಿಗಳಿಂದ ಎಂಡಿಎಂಎ ಡ್ರಗ್ಸ್ ಪಡೆದುಕೊಳ್ಳುತ್ತಿದ್ದ ಈ ಆಂಬುಲೆನ್ಸ್ ಚಾಲಕ ಜಲೀಲ್
ಬಾಬಾ, ತುರ್ತು ಸೇವೆಯ ನೆಪದಲ್ಲಿ ತನ್ನ ಆಂಬುಲೆನ್ಸ್‌ನಲ್ಲೇ ಜಿಲ್ಲೆಯ ಕಾಲೇಜು ವಿದ್ಯಾರ್ಥಿಗಳಿಗೆ,
ಡಾಕ್ಟರ್‌ಗಳಿಗೆ ಹಾಗೂ ಯುವಕರಿಗೆ ಡ್ರಗ್ಸ್ ಸರಬರಾಜು ಮಾಡುತ್ತಿರೋದು ಗೊತ್ತಾಗಿದೆ.

ಸದ್ಯ ಈ ಮೂವರು ಆರೋಪಿಗಳ ಬಂಧನ ಬೆನ್ನಲ್ಲೇ ಜಲೀಲ್ ಬಾಬಾ ನಾಪತ್ತೆಯಾಗಿದ್ದು, 8 ದಿನಗಳಿಂದ ತನ್ನ 
ಮೊಬೈಲ್ ಸ್ವಿಚ್ ಆಫ್ ಮಾಡಿ ಪರಾರಿಯಾಗಿದ್ದಾನೆ. ಸದ್ಯ ಸಿಸಿಬಿ ಪೊಲೀಸರು ಮಂಗಳೂರಿನ ಪ್ರಿನ್ಸಿಪಾಲ್
ಸೆಷನ್ಸ್ ನ್ಯಾಯಾಲಯಕ್ಕೆ ವರದಿ ಸಲ್ಲಿಸಿದ್ದು, ಜಲೀಲ್ ಬಾಬಾನನ್ನು 4ನೇ ಆರೋಪಿಯನ್ನಾಗಿ ಉಲ್ಲೇಖಿಸಿ
ಆತನ ಬಂಧನ ಬಾಕಿ ಇದೆ ಎಂದು ತಿಳಿಸಿದ್ದಾರೆ.

Advertisement