# 20 ಲಕ್ಷ ಸಾಲ ವಾಪಾಸ್ ಕೊಡದ ಭಕ್ತ – ಮನೆಯ ಮುಂದೆ ಪ್ರತಿಭಟನೆ ಕುಳಿತ ಖ್ಯಾತ ಸ್ವಾಮೀಜಿ!!

- Link: https://hosakannada.com/news/devotee-fails-to-repay-20-lakh-loan-renowned-swamiji-stages-protest-in-front-of-his-house/
- Published: 2026-09-18T14:03:24+00:00
- Author: ಹೊಸಕನ್ನಡ ನ್ಯೂಸ್

ತಮ್ಮ ಮಠದ ಭಕ್ತನೊಬ್ಬನು ತಮ್ಮ ಬಳಿ ಸುಮಾರು 20 ಲಕ್ಷ ಸಾಲವನ್ನು ಪಡೆದು ಅದನ್ನು ಹಿಂದಿರುಗಿಸದೆ 
ಸತಾಯಿಸುತ್ತಿರುವ ಕಾರಣ ಸ್ವಾಮೀಜಿಯೊಬ್ಬರು ನೇರವಾಗಿ ಬೆಂಗಳೂರಿನಲ್ಲಿ ಸಾಲಗಾರನ ಮನೆ ಮುಂದೆಯೇ ಪ್ರತಿಭಟನೆಗೆ
ಕುಳಿತಿರುವ ಅಪರೂಪದ ಹಾಗೂ ರೋಚಕ ಘಟನೆ ಬೆಳಕಿಗೆ ಬಂದಿದೆ.

Sponsored

ಬಾಗಲಕೋಟೆಯ ಗುಳೇದಗುಡ್ಡದ ಶ್ರೀ ಜಗದ್ಗುರು ಗುರುಸಿದ್ದೇಶ್ವರ ಬ್ರಹನ್ಮಠದ 1008 ಜಗದ್ಗುರು ಬಸವರಾಜ
ಪಟ್ಟದಾರ್ಯ ಮಹಾ ಸ್ವಾಮೀಜಿಯವರ ಬಳಿ ಅದೇ ಊರಿನ ವ್ಯಕ್ತಿಯೊಬ್ಬರು ಹಲವು ವರ್ಷಗಳ ಹಿಂದೆ ಬರೋಬ್ಬರಿ
20 ಲಕ್ಷ ರೂ.ಗಳನ್ನು ಸಾಲವಾಗಿ ಪಡೆದುಕೊಂಡಿದ್ದರು. ಸ್ವಾಮೀಜಿಯ ಬಳಿ ಸಾಲ ಪಡೆದಿದ್ದ ಆ ವ್ಯಕ್ತಿ 
ನಂತರ ಬಾಗಲಕೋಟೆಯಿಂದ ಬಂದು ಬೆಂಗಳೂರಿನಲ್ಲಿ ನೆಲೆಸಿದ್ದನು. ಆದರೆ, ವರ್ಷಗಳು ಕಳೆದರೂ ತಾನು ಪಡೆದಿದ್ದ
ಲಕ್ಷಾಂತರ ರೂ. ಸಾಲವನ್ನು ಮಾತ್ರ ವಾಪಸ್ ನೀಡಿರಲಿಲ್ಲ.

Advertisement

Advertisement

ಹಣ ಮರಳಿಸುವಂತೆ ಸ್ವಾಮೀಜಿ ಹಲವು ಬಾರಿ ಕೇಳಿಕೊಂಡರೂ ಆ ವ್ಯಕ್ತಿ ನೆಪ ಹೇಳುತ್ತಿದ್ದನು. ಇದರಿಂದ 
ನೊಂದ ಸ್ವಾಮೀಜಿ, ಸಾಲ ವಾಪಸ್ ಪಡೆಯಲು ನೇರವಾಗಿ ಬೆಂಗಳೂರಿಗೆ ಬಂದಿದ್ದಾರೆ. ಬೆಂಗಳೂರಿನ ಲಾಲ್ ಬಾಗ್
ರಸ್ತೆಯ ಬಳಿ ಇರುವ ಸಾಲಗಾರನ ಮನೆಯನ್ನು ಹುಡುಕಿಕೊಂಡು ಹೋದ ಸ್ವಾಮೀಜಿಗೆ ಆಘಾತ ಕಾದಿತ್ತು. ಸ್ವಾಮೀಜಿ
ಬರುತ್ತಾರೆಂಬ ವಿಷಯ ತಿಳಿದು ಸಾಲಗಾರ ತನ್ನ ಮನೆಗೆ ಬೀಗ ಹಾಕಿ ತಲೆಮರೆಸಿಕೊಂಡಿದ್ದಾನೆ. ಇದರಿಂದ ಆಕ್ರೋಶಗೊಂಡ
ಸ್ವಾಮೀಜಿ, ಬೀಗ ಹಾಕಿರುವ ಮನೆ ಮುಂಭಾಗದಲ್ಲೇ ಧರಣಿ ಕುಳಿತು ಪ್ರತಿಭಟನೆ ಆರಂಭಿಸಿದ್ದಾರೆ. 

ಪ್ರತಿಭಟನೆಗೂ ಮುನ್ನ ಸ್ವಾಮೀಜಿಯವರು ತಮ್ಮ ಮಠದಲ್ಲಿ  ‘ನಾನು ನೀಡಿದ 20 ಲಕ್ಷ ರೂಪಾಯಿ ಸಾಲವನ್ನು
ಆ ವ್ಯಕ್ತಿ ವಾಪಸ್ ನೀಡದೆ ಹೋದರೆ, ನಾನು ಅಲ್ಲೇ ಉಪವಾಸ ಸತ್ಯಾಗ್ರಹ ಮಾಡ್ತೇನೆ. ಒಂದೊಮ್ಮೆ ಈ ಹೋರಾಟದಲ್ಲಿ
ನಾನು ನಿಧನರಾದರೆ, ನನ್ನ ಪಾರ್ಥಿವ ಶರೀರವನ್ನು ವಿಜಯಪುರ ಮೆಡಿಕಲ್ ಕಾಲೇಜಿಗೆ ದಾನವಾಗಿ ನೀಡಬೇಕು’
ಎಂದು ಮರಣ ಪತ್ರವನ್ನು ಬರೆದಿಟ್ಟು ಬಂದಿದ್ದಾರೆ, ಎನ್ನಲಾಗಿದೆ.

Advertisement
