# ಗಂಡಸರಿಗಿಂತ ಹೆಚ್ಚಾಗಿ ಹೆಂಗಸರಿಗೆ ಲೋನ್ ಕೊಡಲು ಮುಂದಾಗುತ್ತಿವೆ ಬ್ಯಾಂಕುಗಳು – ಕಾರಣ ಗೊತ್ತಾದ್ರೆ ಹುಬ್ಬೇರುತ್ತೆ

- Link: https://hosakannada.com/news/banks-are-offering-loans-to-women-more-than-men-the-reason-is-shocking/
- Published: 2026-05-28T19:55:43+00:00
- Author: ಹೊಸಕನ್ನಡ ನ್ಯೂಸ್

ಮನೆಯ ಜವಾಬ್ದಾರಿಗಳನ್ನು ನಿರ್ವಹಿಸುವ ಪುರುಷ ತನಗೇನಾದರೂ ಕಷ್ಟಗಳು ಎದುರಾದಾಗ ಅಥವಾ ತನ್ನ ಆಸೆಗಳನ್ನು,
ಕುಟುಂಬದ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳಲು ಹಣಕಾಸಿನ ತೊಂದರೆಯಾದಾಗ ಬ್ಯಾಂಕುಗಳಲ್ಲಿ ಲೋನ್ ಮಾಡಿ
ಹಣ ಪಡೆಯುತ್ತಿದ್ದನು. ಒಂದು ಲೆಕ್ಕದಲ್ಲಿ ನೋಡುವುದಾದರೆ ಹೆಚ್ಚು ಪುರುಷರೇ ಬ್ಯಾಂಕಿನಲ್ಲಿ ಲೋನ್ 
ಮಾಡಿಸುವುದು. ಆದರೆ ಇದೀಗ ಬ್ಯಾಂಕುಗಳು ಗಂಡಸರಿಗಿಂತ ಹೆಚ್ಚಾಗಿ ಹೆಂಗಸರಿಗೆ ಲೋನ್ ಕೊಡಲು ಆಸಕ್ತಿ
ತೋರುತ್ತವೆ ಎಂಬ ಅಂಶ ಬಯಲಾಗಿದೆ. ಹಾಗಿದ್ದರೆ ಇದಕ್ಕೆ ಏನು ಕಾರಣ? 

Sponsored

ಬ್ಯಾಂಕುಗಳು ಮತ್ತು ಹಣಕಾಸು ಸಂಸ್ಥೆಗಳ ಪ್ರಕಾರ, ಮಹಿಳೆಯರು ತಮ್ಮ ಹಣಕಾಸಿನ ವಹಿವಾಟುಗಳಲ್ಲಿ ಹೆಚ್ಚು
ಶಿಸ್ತುಬದ್ಧರಾಗಿರುತ್ತಾರೆ. ಅವರು ತಮ್ಮ ಇಎಂಐ (EMI) ಗಳನ್ನು ಸಮಯಕ್ಕೆ ಸರಿಯಾಗಿ ಪಾವತಿಸುವುದಲ್ಲದೆ,
ಸಾಲ ಮರುಪಾವತಿಯಲ್ಲಿ ಸುಸ್ತಿದಾರರಾಗುವುದು ತೀರಾ ಅಪರೂಪ. ಮಹಿಳೆಯರು ಅತ್ಯಂತ ಸ್ಪಷ್ಟವಾದ ಉದ್ದೇಶಗಳಿಗಾಗಿ
ಮಾತ್ರ ಸಾಲವನ್ನು ಪಡೆಯುತ್ತಾರೆ. ಇದರಿಂದ  ಬ್ಯಾಂಕುಗಳು ಮಹಿಳಾ ಗ್ರಾಹಕರಿಗೆ ಹೆಚ್ಚಿನ ಆದ್ಯತೆ ನೀಡುತ್ತಾರೆ.

Advertisement

Advertisement

ಮಹಿಳೆಯರು ಹೆಚ್ಚಾಗಿ ಇಂತಹ ಜವಾಬ್ದಾರಿಯುತ ಉದ್ದೇಶಗಳಿಗಾಗಿಯೇ ಸಾಲವನ್ನು ಆಯ್ದುಕೊಳ್ಳುತ್ತಾರೆ. 
ಇತ್ತೀಚಿನ ದಿನಗಳಲ್ಲಿ ಮಹಿಳೆಯರಲ್ಲಿ ಕ್ರೆಡಿಟ್ ಕಾರ್ಡ್ ಬಳಕೆ ಹೆಚ್ಚಾಗಿದ್ದರೂ, ಅವರು ಅದನ್ನು ಅತ್ಯಂತ
ಜಾಗರೂಕತೆಯಿಂದ ಮತ್ತು ಮಿತವಾಗಿ ಬಳಸುತ್ತಾರೆ. ಅಷ್ಟೇ ಅಲ್ಲದೆ, ಪಡೆದ ಸಾಲವನ್ನು ಆದಷ್ಟು ಬೇಗ ತೀರಿಸಿ,
ಆರ್ಥಿಕ ಸ್ಥಿರತೆ ಕಾಯ್ದುಕೊಳ್ಳಲು ಮಹಿಳೆಯರು ಹೆಚ್ಚಿನ ಒಲವು ತೋರುತ್ತಾರೆ.

ಬ್ಯಾಂಕ್‌ಬಜಾರ್ ಅಂಕಿ-ಅಂಶಗಳ ಪ್ರಕಾರ, ಸಾಲವನ್ನು ಅವಧಿಗಿಂತ ಮುಂಚಿತವಾಗಿಯೇ ಮರುಪಾವತಿಸಲು ಬಯಸುವ
ಮಹಿಳೆಯರ ಪ್ರಮಾಣ ಶೇ. 18.29 ರಷ್ಟಿದ್ದರೆ, ಪುರುಷರಲ್ಲಿ ಈ ಪ್ರಮಾಣ ಶೇ. 17.43 ರಷ್ಟಿದೆ. ಇದು 
ಮಹಿಳೆಯರಲ್ಲಿರುವ ಆರ್ಥಿಕ ಸ್ವಾತಂತ್ರ್ಯದ ತೀವ್ರ ಹಂಬಲವನ್ನು ಪ್ರತಿಬಿಂಬಿಸುತ್ತದೆ ಎಂದು ಅರ್ಥಶಾಸ್ತ್ರಜ್ಞರು
ವಿಶ್ಲೇಷಿಸುತ್ತಾರೆ.

ಫಿಂಟೆಕ್ ಸಂಸ್ಥೆಯಾದ ‘ಬ್ಯಾಂಕ್‌ಬಜಾರ್’ (BankBazaar) ಅಂಕಿ-ಅಂಶಗಳ ಪ್ರಕಾರ, ಅಟೈನ್‌ಮೆಂಟ್ ಇಂಡೆಕ್ಸ್‌ನಲ್ಲಿ(
Attainment Index) ಪುರುಷರ 82.1 ಸ್ಕೋರ್‌ಗೆ ಹೋಲಿಸಿದರೆ ಮಹಿಳೆಯರು 84.3 ಸ್ಕೋರ್ ಪಡೆದು ಮುಂಚೂಣಿಯಲ್ಲಿದ್ದಾರೆ.
ಇನ್ನು ಸಾಲ ಮರುಪಾವತಿ ಮಾಡದವರಲ್ಲಿ ಪುರುಷರ ಪ್ರಮಾಣ ಶೇ. 14.29 ರಷ್ಟಿದ್ದರೆ, ಮಹಿಳೆಯರ ಪ್ರಮಾಣ
ಕೇವಲ ಶೇ. 10.98 ರಷ್ಟಿದೆ. ಹಾಗೆಯೇ, ನಿರಂತರವಾಗಿ ಸುಸ್ತಿದಾರರಾಗುವವರಲ್ಲಿ ಪುರುಷರು ಶೇ. 7.14
ರಷ್ಟಿದ್ದರೆ, ಮಹಿಳೆಯರು ಕೇವಲ ಶೇ. 3.25 ರಷ್ಟಿದ್ದಾರೆ. ಇದರೊಂದಿಗೆ ತಮ್ಮ ಕ್ರೆಡಿಟ್ ಸ್ಕೋರ್ ಅನ್ನು
ನಿರಂತರವಾಗಿ ಟ್ರ್ಯಾಕ್ ಮಾಡುವಲ್ಲಿಯೂ ಮಹಿಳೆಯರೇ ಮುಂಚೂಣಿಯಲ್ಲಿದ್ದು, ಶೇ. 88 ರಷ್ಟು ಪುರುಷರಿಗೆ
ಹೋಲಿಸಿದರೆ ಶೇ. 90 ರಷ್ಟು ಮಹಿಳೆಯರು ನಿಯಮಿತವಾಗಿ ತಮ್ಮ ಕ್ರೆಡಿಟ್ ಸ್ಕೋರ್ ಪರಿಶೀಲಿಸುತ್ತಾರೆ.

ಬ್ಯಾಂಕ್‌ಬಜಾರ್’ ವರದಿಯ ಪ್ರಕಾರ, ಮಹಿಳೆಯರು ಹೆಚ್ಚಾಗಿ ತುರ್ತು ಪರಿಸ್ಥಿತಿಗಳು ಮತ್ತು ಅಗತ್ಯ ಸಂದರ್ಭಗಳಲ್ಲಿ
ಮಾತ್ರ ಸಾಲದ ಮೊರೆ ಹೋಗುತ್ತಾರೆ, ಆದರೆ ಪುರುಷರು ಸಣ್ಣಪುಟ್ಟ ಆಸೆ-ಆಕಾಂಕ್ಷೆಗಳು ಹಾಗೂ ದಿನನಿತ್ಯದ
ಅಗತ್ಯಗಳಿಗಾಗಿಯೂ ಸಾಲವನ್ನು ಅವಲಂಬಿಸುತ್ತಾರೆ. ಕೇವಲ ತುರ್ತು ಅಗತ್ಯಗಳಿಗಾಗಿ ಬ್ಯಾಂಕುಗಳನ್ನು ಅವಲಂಬಿಸುವ
ಮಹಿಳೆಯರ ಪ್ರಮಾಣ ಶೇ. 29.27 ರಷ್ಟಿದ್ದರೆ, ಇದೇ ಉದ್ದೇಶಕ್ಕಾಗಿ ಸಾಲ ಪಡೆಯುವ ಪುರುಷರ ಪ್ರಮಾಣ ಶೇ.
25.43 ರಷ್ಟಿದೆ ಎಂದು ಅಂಕಿ-ಅಂಶಗಳು ಸ್ಪಷ್ಟಪಡಿಸುತ್ತವೆ.

Advertisement