# ಸೆಲ್ಫಿ ವಿಚಾರವಾಗಿ ಅಮೇರಿಕಾ ಅಧ್ಯಕ್ಷ ಟ್ರಂಪ್ ಗೆ ತಿರುಗೇಟು- ಇಟಲಿ ಪ್ರಧಾನಿ ಮೆಲೋನಿಗೆ ತವರಲ್ಲಿ ಅದ್ದೂರಿ ಸ್ವಾಗತ!!

- Link: https://hosakannada.com/international/trump-hits-back-over-selfie-pm-meloni-gets-a-grand-welcome-in-italy/
- Published: 2026-06-22T16:31:01+00:00
- Author: ಹೊಸಕನ್ನಡ ನ್ಯೂಸ್

ಫ್ರಾನ್ಸ್‌ನಲ್ಲಿ ನಡೆಯುತ್ತಿರುವ ಜಿ7 ಶೃಂಗಸಭೆಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ
ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ನಡುವೆ ನಡೆದಿದ್ದ ವಾಕ್ಸಮರ ಮತ್ತು ರಾಜತಾಂತ್ರಿಕ ಸಂಘರ್ಷ ಈಗ 
ಜಾಗತಿಕ ಮಟ್ಟದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿತ್ತು. ಸೆಲ್ಫಿ ವಿಚಾರವಾಗಿ ಸಣ್ಣ ಬುದ್ಧಿ ತೋರಿಸಿದ್ದ
ಫ್ರಮ್ ಅವರಿಗೆ ಮೆಲೋನಿ ಅವರು ವಿಡಿಯೋ ಮಾಡಿ ಖಡಕ್ ತಿರುಗೇಟು ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಇಟಲಿ
ಪ್ರಧಾನಿ ಮೆಲೋನಿ ಅವರಿಗೆ ತಮ್ಮ ತವರು ನೆಲದಲ್ಲಿ ಅದ್ಧೂರಿ ಸ್ವಾಗತ ಕೋರಲಾಗಿದೆ

Sponsored

ಇರಾನ್ ಯುದ್ಧದ ವಿಚಾರದಲ್ಲಿ ಅಮೆರಿಕಕ್ಕೆ ಇಟಲಿಯ ರನ್‌ವೇಗಳನ್ನು ಬಳಸಲು ಮೆಲೋನಿ ನಿರಾಕರಿಸಿದ್ದರು.
ಇದರಿಂದ ಆಕ್ರೋಶಗೊಂಡಿದ್ದ ಡೊನಾಲ್ಡ್ ಟ್ರಂಪ್, ಇಟಲಿಯ ಪ್ರಮುಖ ಟಿವಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ,“
ಶೃಂಗಸಭೆಯ ವೇಳೆ ಜಾರ್ಜಿಯಾ ಮೆಲೋನಿ ನನ್ನೊಂದಿಗೆ ಫೋಟೋ ತೆಗೆದುಕೊಳ್ಳಲು ಪದೇ ಪದೇ ಬೇಡಿಕೊಂಡರು (
Begged). ಅವರ ಜನಪ್ರಿಯತೆ ಇಟಲಿಯಲ್ಲಿ ಕುಸಿದಿರುವುದರಿಂದ ನನ್ನೊಂದಿಗೆ ಫೋಟೋ ತೆಗೆಸಿಕೊಳ್ಳಲು ಮುಗಿಬಿದ್ದರು.
ಅವರ ಪರಿಸ್ಥಿತಿ ನೋಡಿ ಅಯ್ಯೋ ಎನಿಸಿ ನಾನು ಫೋಟೋಗೆ ಒಪ್ಪಿಕೊಂಡೆ” ಎಂದು ಲೇವಡಿ ಮಾಡಿದ್ದರು.

Advertisement

Advertisement

ಟ್ರಂಪ್ ಅವರ ಈ ಅಹಂಕಾರದ ಹೇಳಿಕೆಗೆ ತಕ್ಷಣವೇ ಇನ್‌ಸ್ಟಾಗ್ರಾಮ್ ವಿಡಿಯೋ ಮೂಲಕ ಇಟಲಿ ಪ್ರಧಾನಿ ತೀಕ್ಷ್ಣವಾಗಿ
ಪ್ರತಿಕ್ರಿಯಿಸಿದ್ದಾರೆ. “ಡೊನಾಲ್ಡ್ ಟ್ರಂಪ್ ಅವರ ಹೇಳಿಕೆ ಸಂಪೂರ್ಣ ಕಲ್ಪಿತ ಮತ್ತು ಸುಳ್ಳು. ಯುರೋಪ್‌ನ
ಅತ್ಯಂತ ಹಳೆಯ ಮಿತ್ರರಾಷ್ಟ್ರದ ಪ್ರಧಾನಿಯ ಬಗ್ಗೆ ಅಮೆರಿಕ ಅಧ್ಯಕ್ಷರು ಈ ರೀತಿ ವರ್ತಿಸುತ್ತಿರುವುದು
ನನಗೆ ಆಶ್ಚರ್ಯ ತಂದಿದೆ. ಪಾಶ್ಚಿಮಾತ್ಯರ ಶತ್ರುಗಳ ಮುಂದೆ ಮಣಿಯುವ ಟ್ರಂಪ್, ಒಂದು ವಿಷಯ ನೆನಪಿಡಬೇಕು:
ಇಟಲಿ ಮತ್ತು ನಾನು ಯಾರ ಮುಂದೆಯೂ ಎಂದಿಗೂ ಬೇಡುವುದಿಲ್ಲ” ಎಂದು ತಿರುಗೇಟು ನೀಡಿದ್ದರು.

ಮೆಲೋನಿ ಅವರ ಈ ಸ್ವಾಭಿಮಾನದ ನಿಲುವಿಗೆ ಇಟಲಿಯ ಆಡಳಿತ ಮತ್ತು ವಿರೋಧ ಪಕ್ಷಗಳು ಒಟ್ಟಾಗಿ ಬೆಂಬಲ ಸೂಚಿಸಿದ್ದವು.
ಈ ಬೆನ್ನಲ್ಲೇ ಜಾರ್ಜಿಯಾ ಮೆಲೋನಿ ಅವರು ಇಟಲಿಯ ‘ಗೆಮೋನಾ ಡೆಲ್ ಫ್ರಿಯುಲಿ’ ಪ್ರದೇಶಕ್ಕೆ ಭೇಟಿ ನೀಡಿದರು.
ಈ ವೇಳೆ ಸ್ಥಳೀಯ ಜನತೆ ತಮ್ಮ ಪ್ರಧಾನಿಯನ್ನು ಅತ್ಯಂತ ಆತ್ಮೀಯವಾಗಿ, ಪ್ರೀತಿಯಿಂದ ಮತ್ತು ಭರ್ಜರಿಯಾಗಿ
ಬರಮಾಡಿಕೊಂಡರು. ಸಾವಿರಾರು ಬೆಂಬಲಿಗರು ಮೆಲೋನಿ ಪರ ಘೋಷಣೆಗಳನ್ನು ಕೂಗುತ್ತಾ, ಹೂಮಳೆ ಗರೆದು ದೇಶದ
ಸ್ವಾಭಿಮಾನ ಎತ್ತಿಹಿಡಿದ ನಾಯಕಿಗೆ ಜೈಕಾರ ಹಾಕಿದರು. ಈ ಭರ್ಜರಿ ಸ್ವಾಗತದ ವಿಡಿಯೋವನ್ನು ಹಂಚಿಕೊಂಡಿರುವ
ಮೆಲೋನಿ, “ನಿಮ್ಮ ಪ್ರೀತಿ ಮತ್ತು ಈ ಆತ್ಮೀಯ ಸ್ವಾಗತಕ್ಕೆ ಧನ್ಯವಾದಗಳು” ಎಂದು ಸರಳವಾದ ಸಂದೇಶ ಬರೆದಿದ್ದಾರೆ.

Advertisement