# ಪ್ರೇಮಿಗಾಗಿ ಸುರಂಗ ತೋಡಿದ ಹುಲಿ: ಬಕ್ಸಾ ಅರಣ್ಯದಿಂದ ಮತ್ತೊಮ್ಮೆ ಅಸ್ಸಾಂ ಕಡೆಗೆ ರಹಸ್ಯ ಪಯಣ!

- Link: https://hosakannada.com/interesting/the-tiger-dug-a-tunnel-for-love-a-secret-journey-from-buxa-forest-towards-assam-once-again/
- Published: 2026-11-10T05:32:52+00:00
- Author: ಹೊಸಕನ್ನಡ ನ್ಯೂಸ್

​ಬಕ್ಸಾ (ಪಶ್ಚಿಮ ಬಂಗಾಳ): “ಪ್ರೀತಿಸಬಾರದು, ಪ್ರೀತಿಸಿದ ಮೇಲೆ ಜಗಕ್ಕೆ ಹೆದರಬಾರದು” ಎಂಬ ಕನ್ನಡ
ಸಿನಿಮಾದ ಜನಪ್ರಿಯ ಸಾಲಿಗೆ ಅಚ್ಚರಿಯೆಂಬಂತೆ ಜೀವ ತುಂಬಿದೆ ಪಶ್ಚಿಮ ಬಂಗಾಳದ ಬಕ್ಸಾ ಹುಲಿ ಸಂರಕ್ಷಿತ
ಅರಣ್ಯದ ಈ ಘಟನೆ. ಬಿಗಿ ಭದ್ರತೆಯ ಕಾಂಕ್ರೀಟ್ ಗೋಡೆಗಳ ನಡುವೆಯೂ ತನ್ನ ಇನಿಯನಿಗಾಗಿ ಸುರಂಗ ತೋಡಿ 
ಅಸ್ಸಾಂ ಕಡೆಗೆ ಪರಾರಿಯಾಗಿರುವ BTR TF-1 ಹೆಣ್ಣು ಹುಲಿಯ ಸಾಹಸಗಾಥೆ ಈಗ ವನ್ಯಜೀವಿ ವಲಯದಲ್ಲಿ ಭಾರಿ
ಸಂಚಲನ ಮೂಡಿಸಿದೆ. ಕಟ್ಟುನಿಟ್ಟಿನ ಕಣ್ಗಾವಲನ್ನು ಮೀರಿ ಹುಲಿಯೊಂದು ಈ ರೀತಿಯ ಜಾಣ್ಮೆಯ ಪಲಾಯನಗೈದಿರುವುದು
ಅರಣ್ಯ ಅಧಿಕಾರಿಗಳನ್ನೇ ದಂಗುಬಡಿಸಿದೆ.

Sponsored

​ಅರಣ್ಯ ಇಲಾಖೆಯ ವರದಿ ಪ್ರಕಾರ, ಭಾನುವಾರ ’25-ಮೈಲ್ ಟವರ್’ ಬಳಿಯ ನೈಸರ್ಗಿಕ ಆವರಣದಲ್ಲಿದ್ದ ಈ ಹೆಣ್ಣು
ಹುಲಿ ಪೂರ್ವದತ್ತ ಸಾಗಲಾರಂಭಿಸಿತ್ತು. ಬಾಲಾ ನದಿ ದಾಟಿ ’27-ಮೈಲ್’ ಅರಣ್ಯ ವಸತಿ ಪ್ರದೇಶ ತಲುಪಿದ
ಬಳಿಕವಷ್ಟೇ ಆಶ್ಚರ್ಯಕರ ಸಂಗತಿಯೊಂದು ಬೆಳಕಿಗೆ ಬಂದಿದೆ. ಆವರಣದಿಂದ ಹೊರಬರಲು ಸುಮಾರು ಎರಡು ಅಡಿ 
ಅಗಲ ಹಾಗೂ ನಾಲ್ಕು ಆಳದ ಕಾಂಕ್ರೀಟ್ ಗೋಡೆಯ ಕೆಳಗಿನ ಮಣ್ಣನ್ನು ತನ್ನ ಪಂಜಗಳಿಂದಲೇ ಕೆತ್ತಿ ಹುಲಿ 
ಸುರಂಗ ನಿರ್ಮಿಸಿರುವುದು ತನಿಖೆಯಿಂದ ತಿಳಿದುಬಂದಿದೆ. ಹುಲಿಯೊಂದು ಈ ರೀತಿ ಸುರಂಗ ತೋಡಿ ತಪ್ಪಿಸಿಕೊಳ್ಳುವುದು
ಅತ್ಯಂತ ಅಪರೂಪದ ವಿದ್ಯಮಾನವಾಗಿದೆ.

Advertisement

Advertisement

​ಅಸ್ಸಾಂ ಕಡೆಗೆ ಪದೇ ಪದೆ ಒಲವಿನ ಸೆಳೆತವೇ?
​ಕೇವಲ ಐದು ದಿನಗಳ ಹಿಂದಷ್ಟೇ ಅಸ್ಸಾಂನ ರೈಮೋನಾ ಹುಲಿ
ಸಂರಕ್ಷಿತ ಅರಣ್ಯದ ಸಮೀಪ 13 ದಿನಗಳ ಕಾರ್ಯಾಚರಣೆ ನಡೆಸಿ, ನವೆಂಬರ್ 3ರಂದು ಈ ಹುಲಿಯನ್ನು ಸೆರೆಹಿಡಿಯಲಾಗಿತ್ತು.
ಮರುದಿನವೇ (ನವೆಂಬರ್ 4) ಇದನ್ನು ವಾಪಸ್ ತಂದು ಬಕ್ಸಾದ ಆವರಣದಲ್ಲಿ ಬಿಡಲಾಗಿತ್ತು. ಆದರೆ, ಕೇವಲ 
ಐದು ದಿನಗಳ ಅಂತರದಲ್ಲೇ ಇದು ಮತ್ತೆ ಮಾಯವಾಗಿದೆ.​ಅಸ್ಸಾಂ ಕಾಡುಗಳಲ್ಲಿದ್ದಾಗ ಈ ಹೆಣ್ಣು ಹುಲಿ ಅಲ್ಲಿನ
ಗಂಡು ಹುಲಿಯೊಂದಿಗೆ ಗಾಢ ಒಡನಾಟ ಬೆಳೆಸಿರಬಹುದು ಎಂದು ಅರಣ್ಯ ಅಧಿಕಾರಿಗಳು ಶಂಕಿಸಿದ್ದಾರೆ. ಆ ಗಂಡು
ಹುಲಿ ಬಿಟ್ಟುಹೋದ ವಾಸನೆಯ ಗುರುತುಗಳನ್ನು ಅಥವಾ ಅದರ ಸೆಳೆತವನ್ನು ಹಿಂಬಾಲಿಸಿಯೇ ಹೆಣ್ಣು ಹುಲಿ ಪದೇ
ಪದೆ ಅಸ್ಸಾಂ ಹಾದಿ ಹಿಡಿಯುತ್ತಿದೆ ಎಂಬುದು ಅಧಿಕಾರಿಗಳ ಊಹೆಯಾಗಿದೆ.

​ಅಧಿಕಾರಿಗಳಿಗೆ ತಲೆನೋವಾಗಿರುವ ‘ಶ್ಯಾಡೋ ಝೋನ್’ ಸವಾಲು
​ಹುಲಿ ಪರಾರಿಯಾದ ಸುದ್ದಿ ತಿಳಿಯುತ್ತಿದ್ದಂತೆ
ಅರಣ್ಯ ಇಲಾಖೆ ತೀವ್ರ ಶೋಧ ಆರಂಭಿಸಿದೆ. ಹುಲಿಗೆ ಅಳವಡಿಸಿರುವ ಹೈ-ಫ್ರೀಕ್ವೆನ್ಸಿ ರೇಡಿಯೋ ಕಾಲರ್ 
ಸಿಗ್ನಲ್ ಆಧರಿಸಿ ಸುಮಾರು 60ಕ್ಕೂ ಹೆಚ್ಚು ತರಬೇತಿ ಪಡೆದ ಸಿಬ್ಬಂದಿ ಹಾಗೂ ಭಾರತ್, ಸಾರಥಿ ಮತ್ತು
ವಿಠ್ಠಲ ಎಂಬ ಮೂರು ಕುಮ್ಕಿ ಆನೆಗಳನ್ನು ಕಾರ್ಯಾಚರಣೆಗೆ ಬಳಸಿಕೊಳ್ಳಲಾಗಿದೆ. ಆದರೆ, 27-ಮೈಲ್ ವಸತಿ
ಪ್ರದೇಶ ದಾಟಿದ ನಂತರ ಹುಲಿಯ ಯಾವುದೇ ಸುಳಿವು ಸಿಕ್ಕಿಲ್ಲ. ಹೆಣ್ಣು ಹುಲಿ ಕಾಡಿನ ‘ಶ್ಯಾಡೋ ಝೋನ್’(
ನೆರಳು ವಲಯ) ಪ್ರವೇಶಿಸಿರುವುದರಿಂದ ರೇಡಿಯೋ ಕಾಲರ್ ಸಿಗ್ನಲ್‌ಗಳು ಕೆಲಸ ಮಾಡುತ್ತಿಲ್ಲ. ಇದು ಅರಣ್ಯ
ಸಿಬ್ಬಂದಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ರಾತ್ರಿಯೊಳಗೆ ಈ ಹುಲಿ ಸಂಕೋಶ್ ನದಿ ದಾಟಿ ಅಸ್ಸಾಂನ
ರೈಮೋನಾ ಅರಣ್ಯದ ಉತ್ತರ ವಲಯ ತಲುಪಿದರೆ ಪರಿಸ್ಥಿತಿ ಮತ್ತಷ್ಟುಟಿಕ್ಮಕವಾಗಲಿದೆ. ಒಟ್ಟಿನಲ್ಲಿ, ಪ್ರೀತಿಯ
ಸೆಳೆತಕ್ಕೆ ಸಿಲುಕಿ ಬಕ್ಸಾ ಕಾಡು ಬಿಟ್ಟು ಹೊರಟಿರುವ ಈ ಹುಲಿಯ ಸಾಹಸಯಾತ್ರೆ ಈಗಅರಣ್ಯ ಇಲಾಖೆಗೆ ನಿದ್ರೆಗೆಡಿಸಿದೆ.

Advertisement