# ಮಗಳನ್ನು ಕೊಂದ ಆರೋಪದಡಿ ಜೈಲು ಸೇರಿದ ತಂದೆ ಮತ್ತು ಮಗ – 22 ದಿನಗಳ ಬಳಿಕ ಜೀವಂತವಾಗಿ ಪ್ರತ್ಯಕ್ಷವಾದ ಯುವತಿ

- Link: https://hosakannada.com/interesting/father-and-son-jailed-for-killing-daughter-young-woman-emerges-alive-22-days-later/
- Published: 2026-05-30T19:46:12+00:00
- Author: ಹೊಸಕನ್ನಡ ನ್ಯೂಸ್

ಮಗಳನ್ನು ಕೊಂದ ಆರೋಪದಡಿ ತಂದೆ ಮತ್ತು ಮಗ ಇಬ್ಬರು ಜೈಲು ಪಾಲು ಆಗಿದ್ದರು. ಆದರೆ ಇದಾದ 22 ದಿನದ 
ಬಳಿಕ ಸತ್ತ ಮಗಳು ಜೀವಂತವಾಗಿ ಪ್ರತ್ಯಕ್ಷವಾಗಿರುವ ಅಘಾತಕಾರಿ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.

Sponsored

ಮಧ್ಯಪ್ರದೇಶ (Madhya Pradesh)ದ ಬುಡಕಟ್ಟು ಸಮುದಾಯ(tribal)ದಲ್ಲಿ ಇಂತಹ ಒಂದು ವಿಚಿತ್ರ ಪ್ರಕರಣ
ಬೆಳಕಿಗೆ ಬಂದಿದೆ. ಮಧ್ಯಪ್ರದೇಶದ ಬುರ್ಹಾನ್‌ಪುರ ಜಿಲ್ಲೆಯ ಶಿವಾನಿ ಎಂಬ ಯುವತಿ ಏಪ್ರಿಲ್‌ನಲ್ಲಿ 
ನಾಪತ್ತೆಯಾಗಿದ್ದಳು. ವಾರಗಳ ನಂತರ, ಮಹಾರಾಷ್ಟ್ರದ ಜಲಗಾಂವ್ ಜಾಮೋದ್‌ನಲ್ಲಿ ಪತ್ತೆಯಾದ ಸುಟ್ಟ ಶವ
ಶಿವಾನಿಯದ್ದೇ ಎಂದು ಪೊಲೀಸರು ಪ್ರತಿಪಾದಿಸಿದ ಹಿನ್ನೆಲೆಯಲ್ಲಿ ಆಕೆಯ ತಂದೆ ಬಾಪುರಾವ್ ಮತ್ತು ಸಹೋದರ
ಅಜಯ್ ಜೈಲು ಪಾಲಾಗಿದ್ದರು. 

Advertisement

Advertisement

ಖಾಕ್ನಾರ್ ಪೊಲೀಸ್ ಠಾಣಾ ಅಧಿಕಾರಿ ಅಭಿಷೇಕ್ ಜಾಧವ್ ಅವರ ಪ್ರಕಾರ, ಶಿವಾನಿ ಏಪ್ರಿಲ್ 22 ರಂದು ನಾಪತ್ತೆಯಾಗಿದ್ದಳು.
ಕುಟುಂಬಸ್ಥರು ಹುಡುಕಾಟ ನಡೆಸಿ ಮೇ 1 ರಂದು ದೂರು ದಾಖಲಿಸಿದ್ದರು. ತನಿಖೆಯ ವೇಳೆ ಅರ್ಜುನ್ ಎಂಬ ಸ್ಥಳೀಯ
ಯುವಕನೂ ನಾಪತ್ತೆಯಾಗಿರುವುದು ಬೆಳಕಿಗೆ ಬಂದಿತು. ಇವರಿಬ್ಬರೂ ಒಟ್ಟಿಗೆ ಹೋಗಿ ಬೇರೆಡೆ ವಾಸಿಸುತ್ತಿದ್ದರು.
ಆದರೆ ಈ ಸತ್ಯ ಹೊರಬರುವ ಮುನ್ನವೇ ಪ್ರಕರಣ ಬೇರೆ ತಿರುವು ಪಡೆದುಕೊಂಡಿತ್ತು. ಜಲಗಾಂವ್ ಜಾಮೋದ್‌ನಲ್ಲಿ
ಯುವತಿಯೊಬ್ಬಳ ತಲೆಯಿಲ್ಲದ ಮತ್ತು ಭಾಗಶಃ ಸುಟ್ಟ ದೇಹ ಪತ್ತೆಯಾಗಿತ್ತು. ಶವ ಸಂಪೂರ್ಣವಾಗಿ ಹಾನಿಗೊಳಗಾಗಿದ್ದರಿಂದ
ಗುರುತು ಪತ್ತೆ ಹಚ್ಚುವುದು ಅಸಾಧ್ಯವಾಗಿತ್ತು. ಸಿ​​ಸಿಟಿಎನ್‌ಎಸ್ ಪೋರ್ಟಲ್‌ನಲ್ಲಿ ಶಿವಾನಿ ನಾಪತ್ತೆಯಾಗಿರುವ
ಮಾಹಿತಿ ನೋಡಿ, ಮಹಾರಾಷ್ಟ್ರ ಪೊಲೀಸರು ಆ ಶವ ಶಿವಾನಿಯದ್ದೇ ಇರಬಹುದು ಎಂದು ತೀರ್ಮಾನಿಸಿ ಆಕೆಯ ತಂದೆ
ಮತ್ತು ಸಹೋದರನನ್ನು ಬಂಧಿಸಿ ಬುಲ್ಧಾನಾ ಜೈಲಿಗೆ ಅಟ್ಟಿದ್ದರು.

ಯುವತಿಯ ಕೊಲೆ ಆರೋಪದ ಮೇಲೆ ತಂದೆ ಮತ್ತು ಸಹೋದರ ಈಗಾಗಲೇ ಜೈಲು ಶಿಕ್ಷೆ ಅನುಭವಿಸುತ್ತಿದ್ದರು. ತನ್ನ“
ಕೊಲೆ” ಪ್ರಕರಣದಲ್ಲಿ ತಂದೆ ಮತ್ತು ಸಹೋದರ ಜೈಲು ಸೇರಿರುವ ವಿಷಯ ತಿಳಿದ ಶಿವಾನಿ, ತಕ್ಷಣ ತನ್ನ ಸಂಬಂಧಿಕರನ್ನು
ಸಂಪರ್ಕಿಸಿ ತಾನು ಜೀವಂತವಾಗಿರುವುದನ್ನು ತಿಳಿಸಿದ್ದಾಳೆ. ಪೊಲೀಸರು ಆಕೆಯನ್ನು ಪತ್ತೆಹಚ್ಚಿದಾಗ, “
ನಾನು ಅರ್ಜುನ್ ಜೊತೆ ಹೋಗಿದ್ದೆ. ನಾವಿಬ್ಬರೂ ಬದುಕಿದ್ದೇವೆ, ನನ್ನ ತಂದೆ-ಸಹೋದರನನ್ನು ಬಿಡುಗಡೆ 
ಮಾಡಿ,” ಎಂದು ಕೇಳಿಕೊಂಡಿದ್ದಾಳೆ. ಸಂಬಂಧಿಕರ ಸಮ್ಮುಖದಲ್ಲಿ ಹೆಬ್ಬೆರಳ ಗುರುತು ಮತ್ತು ಸರ್ಕಾರದ 
ಗುರುತಿನ ಚೀಟಿಗಳ ಮೂಲಕ ಆಕೆಯ ಗುರುತನ್ನು ಪೊಲೀಸರು ಪರಿಶೀಲಿಸಿ ಖಚಿತಪಡಿಸಿಕೊಂಡಿದ್ದಾರೆ.

ಇದೀಗ ಮಹಾರಾಷ್ಟ್ರ (Maharashtra) ದಲ್ಲಿ ಪತ್ತೆಯಾಗಿದ್ದ ತಲೆಯಿಲ್ಲದ, ಸುಟ್ಟ ದೇಹವು ಈ ಯುವತಿಯದ್ದೇ
ಎಂದು ಯಾವುದೇ ಖಚಿತ ಪುರಾವೆಗಳಿಲ್ಲದೆ ತನಿಖಾಧಿಕಾರಿಗಳು ಹೇಗೆ ತೀರ್ಮಾನಕ್ಕೆ ಬಂದರು ಎಂಬುದು ಈಗ 
ದೊಡ್ಡ ಪ್ರಶ್ನೆಯಾಗಿದೆ. ಅಲ್ಲದೆ ಬೃಂದವಿಲ್ಲದೆ ಪತ್ತೆಯಾದ ಶವ ಯಾರದ್ದು ಎಂಬ ಯಕ್ಷಪ್ರಶ್ನೆ ಎದುರಾಗಿದೆ.

Advertisement