# CYBER SECURITY: ‘ಹೊಸ ವರ್ಷದ ಗಿಫ್ಟ್’ ಎಂಬ ಲಿಂಕ್​ ಕ್ಲಿಕ್ ಮಾಡುವ ಮುನ್ನ ಈ ಸುದ್ದಿ ಓದಿ

- Link: https://hosakannada.com/crime/cyber-security-read-this-news-before-clicking-on-the-link-called-new-years-gift/
- Published: 2025-12-31T14:13:46+00:00
- Author: ಹೊಸಕನ್ನಡ ನ್ಯೂಸ್

CYBER SECURITY: ಹೊಸ ವರ್ಷ 2026ರ ಸಂಭ್ರಮದಲ್ಲಿ ನಮ್ಮ ವಾಟ್ಸ್‌ಆ್ಯಪ್​​, ಇನ್ಸ್ಟಾಗ್ರಾಮ್​​,
ಫೇಸ್​ಬುಕ್​​​​ ಮೆಸೇಂಜರ್​ಗಳು ಶುಭ ಸಂದೇಶಗಳಿಂದ ತುಂಬಿ ತುಳುಕುತ್ತವೆ. ಸಾಮಾನ್ಯ ದಿನಗಳಲ್ಲಿ ಅಂದಾಜು
10-15 ಸಂದೇಶಗಳಿದ್ದರೆ, ಹಬ್ಬದ ದಿನ ಸಾವಿರಕ್ಕೂ ಮೀರಿ ಸಂದೇಶಗಳು ಬಂದರೂ ಅಚ್ಚರಿಯಿಲ್ಲ. ಆದರೆ, 
ಈ ಸಂದರ್ಭದಲ್ಲೇ ಸೈಬರ್ ಅಪರಾಧಿಗಳು ತಮ್ಮ ಕೈ ಚಳಕ ತೋರಿಸುತ್ತಾರೆ.

Sponsored

ಗಿಫ್ಟ್ ಲಿಂಕ್​ಗಳು ಮತ್ತು ಸ್ಕ್ರ್ಯಾಚ್ ಕಾರ್ಡ್​ಗಳು: “ಹ್ಯಾಪಿ ನ್ಯೂ ಇಯರ್! ನಿಮಗೆ ವಿಶೇಷ ಗಿಫ್ಟ್
ಬಂದಿದೆ” ಎಂದು ಆಕರ್ಷಣೀಯ ಸಂದೇಶಗಳೊಂದಿಗೆ ಲಿಂಕ್​ಗಳು ಬರುತ್ತವೆ. ಕಂಪನಿಗಳ ಹೆಸರಿನಲ್ಲಿ (ಅಮೆಜಾನ್,
ಫ್ಲಿಪ್‌ಕಾರ್ಟ್, ಗೂಗಲ್ ಪೇ ಇತ್ಯಾದಿ) ಈ ಲಿಂಕ್​ಗಳನ್ನು ಕಳುಹಿಸಲಾಗುತ್ತದೆ. ಕ್ಲಿಕ್​ ಮಾಡಿದ ಕೂಡಲೇ
ಮಾಲ್ವೇರ್​ (ಗೌಪ್ಯ ಮಾಹಿತಿಗಳ ಲೂಟಿಗಾಗಿ ಇರುವ ಒಂದು ತಂತ್ರಾಂಶ) ಡೌನ್ಲೋಡ್ ಆಗಿ ನಿಮ್ಮ ಫೋನ್ ಹ್ಯಾಕ್
ಆಗುವ ಸಾಧ್ಯತೆ ಶೇ.100ರಷ್ಟಿರುತ್ತದೆ.

Advertisement

Advertisement

APK ಫೈಲ್​ಗಳು (ವಿಷಸ್.apk): “Happy New Year” ಎಂಬ ಹೆಸರಿನ APK ಫೈಲ್​ಗಳು ವಾಟ್ಸ್‌ಆ್ಯಪ್‌​
ನಲ್ಲಿ ಫಾರ್ವರ್ಡ್​ ಆಗುತ್ತವೆ. ಇದನ್ನು ತೆರೆದರೆ ಅಥವಾ ಇನ್ಸ್ಟಾಲ್​ ಮಾಡಿಕೊಂಡರೆ ಫೋನ್ ಸಂಪೂರ್ಣ
ಸೈಬರ್ ಕಳ್ಳರ ನಿಯಂತ್ರಣಕ್ಕೆ ಬಂದುಬಿಡುತ್ತದೆ. ಹಾಗಾಗಿ, “ಅಜ್ಞಾತ ಮೂಲದಿಂದ ಬಂದ ಯಾವುದೇ APK ಫೈಲ್
ತೆರೆಯಬೇಡಿ”.

ಸ್ಟೆನೋಗ್ರಾಫಿ ತಂತ್ರ: ಸಾಮಾನ್ಯ ಫೋಟೋ, ವಿಡಿಯೋ ಅಥವಾ ಆಡಿಯೋ ಫೈಲ್​ಗಳ ಒಳಗೆ ಮಾಲ್ವೇರ್ ಅಥವಾ ಸ್ಪೈವೇರ್
ಅಡಗಿಸಿ ಕಳುಹಿಸುವುದು ಈಗ ಸಾಮಾನ್ಯ. ಫೈಲ್ ಡೌನ್ಲೋಡ್ ಮಾಡಿದ ಕೂಡಲೇ ಆಟೋ-ಎಕ್ಸಿಕ್ಯೂಟ್ ಸ್ಕ್ರಿಪ್ಟ್
ಕಾರ್ಯರೂಪಕ್ಕೆ ಬಂದು ಫೋನ್​ನ ಡೇಟಾ ಕಳುವಾಗುತ್ತದೆ.

QR ಕೋಡ್ ಮತ್ತು ಫೇಕ್ ಕೊರಿಯರ್​: QR ಕೋಡ್​ ಸ್ಕ್ಯಾನ್​ ಮಾಡಿ ಗಿಫ್ಟ್​​ ಪಡೆಯಿರಿ ಎಂದು ಸಂದೇಶಗಳು
ಬರುತ್ತವೆ. ಇತ್ತೀಚೆಗೆ ಹೈ ನೆಟ್ ವರ್ಥ್ ಇಂಡಿವಿಜುವಲ್​ಗಳ (HNI) ಮನೆಗೆ ಲೇಟೆಸ್ಟ್ ಸ್ಮಾರ್ಟ್‌ಫೋನ್​
ಗಳನ್ನು ಕೊರಿಯರ್ ಮೂಲಕ ಕಳುಹಿಸುತ್ತಾರೆ. ಆದರೆ ಅದು ಉಚಿತ ಗಿಫ್ಟ್ ಅಲ್ಲ, ಅದರೊಳಗೆ ಮಾಲ್ವೇರ್ ಪೂರ್ವನಿಯೋಜಿತವಾಗಿ
ಇರುತ್ತದೆ.

ನೀವು ಏನು ಮಾಡಬೇಕು?, ಏನು ಮಾಡಬಾರದು?:

ಅಜ್ಞಾತ ಸಂದೇಶಗಳನ್ನು ಎಚ್ಚರಿಕೆಯಿಂದ ಓದಿ.ಲಿಂಕ್​ಗಳ ಮೇಲೆ ಕ್ಲಿಕ್ ಮಾಡುವ ಮುನ್ನ URL ಗಮನಿಸಿ.(
https:// ಇದೆಯೇ? ಕಂಪನಿಯ ಅಧಿಕೃತ ವೆಬ್​​ಸೈಟ್‌ಗೆ​ ಹೋಗುತ್ತದೆಯೇ?). ಫೈಲ್ ಡೌನ್ಲೋಡ್ ಮಾಡುವ 
ಮುನ್ನ ಎರಡು ಬಾರಿ ಯೋಚಿಸಿ.ಫೋನ್​ನಲ್ಲಿ “Unknown Sources” ಆಫ್ ಮಾಡಿ. ಆ್ಯಂಟಿ ವೈರಸ್ ಆ್ಯಪ್​
ಅಪ್​ಡೇಟ್​ ಇರಿಸಿ. ಯಾವುದೇ ಅಜ್ಞಾತ ಲಿಂಕ್​ ಅಥವಾ QR ಕೋಡ್ ಸ್ಕ್ಯಾನ್ ಮಾಡಬೇಡಿ.”ಗಿಫ್ಟ್ ಬಂದಿದೆ”
ಎಂಬ ಸಂದೇಶಕ್ಕೆ ತಕ್ಷಣ ರಿಯಾಕ್ಟ್ ಮಾಡಬೇಡಿ. APK ಫೈಲ್​​ಗಳನ್ನು ಇನ್ಸ್ಟಾಲ್​ ಮಾಡಬೇಡಿ.ಯಾವುದೇ
OTP ಅಥವಾ ಬ್ಯಾಂಕ್​ ವಿವರಗಳನ್ನು ಯಾರಿಗೂ ಶೇರ್ ಮಾಡಬೇಡಿ.

ಸೈಬರ್ ಕ್ರೈಂಗೆ ಒಳಗಾದರೆ ಏನು ಮಾಡಬೇಕು?:

 ತಕ್ಷಣ 1930ಗೆ ಕರೆ ಮಾಡಿ (ಸೈಬರ್ ಕ್ರೈಂ ಹೆಲ್ಪ್​ಲೈನ್​) ಅಥವಾ www.cybercrime.gov.in ವೆಬ್​
ಸೈಟ್‌ನಲ್ಲಿ ದೂರು ದಾಖಲಿಸಿ.

Advertisement