# ರೇಣುಕಾಸ್ವಾಮಿ ಕೇಸ್‌ನಲ್ಲಿ ಬಿಗ್‌ ಟ್ವಿಸ್ಟ್‌

- Link: https://hosakannada.com/crime/big-twist-in-renukaswamy-case/
- Published: 2026-07-01T12:25:02+00:00
- Author: ಹೊಸಕನ್ನಡ ನ್ಯೂಸ್

ನಟ ದರ್ಶನ್‌ ಆರೋಪಿಯಾಗಿರುವ ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣಕ್ಕೆ ಕುರಿತಂತೆ ಇದೀಗ ಪ್ರಕರಣದ
ಪ್ರಮುಖ ಪ್ರಾಸಿಕ್ಯೂಷನ್‌ ಸಾಕ್ಷಿಯೊಬ್ಬರ ಮೇಲೆ ಪ್ರಭಾವ ಬೀರಲು ಮತ್ತು ಕೋರ್ಟ್‌ಗೆ ನೀಡುವ ಸಾಕ್ಷ್ಯವನ್ನು
ತಿರುಚಲು ಅಪರಿಚಿತ ವ್ಯಕ್ತಿಗಳು ಸಂಚು ರೂಪಿಸಿರುವುದು ಸಾಕ್ಷಿದಾರರಿಂದ ನ್ಯಾಯಾಲಯದಲ್ಲಿ ಬಹಿರಂಗೊಂಡಿರುವುದಾಗಿ
ವರದಿಯಾಗಿದೆ.

Sponsored

ಸಾಕ್ಷಿಯ ಈ ಹೇಳಿಕೆಯನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿರುವ ಸೆಷನ್ಸ್‌ ಕೋರ್ಟ್‌ ಸಾಕ್ಷ್ಯ ತಿರುಚಲು
ಯತ್ನ ಮಾಡುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸುವ ಎಚ್ಚರಿಕೆ ನೀಡಿದ್ದಲ್ಲದೆ, ಸಾಕ್ಷಿದಾರನಿಗೆ
ಕೂಡಲೇ ರಕ್ಷಣೆ ನೀಡುವಂತೆ ತನಿಖಾಧಿಕಾರಿಗಳಿಗೆ ಸೂಚನೆ ನೀಡಿದೆ.

Advertisement

Advertisement

ಪ್ರಕರಣದ 49ನೇ ಸಾಕ್ಷಿಯಾಗಿರುವ, ಚಿತ್ರದುರ್ಗದ ʼದುರ್ಗಾ ಬಾರ್‌ ಆಂಡ್‌ ರೆಸ್ಟೋರೆಂಟ್‌ʼ ಕ್ಯಾಷಿಯ್‌
ಹಾಗೂ ತಮಕೂರಿನ ರಂಗಾಪು ನಿವಾಸಿ ಸಂದೀಪ್‌ ವಿಚಾರಣೆಗೆ ಹಾಜರಾಗಿದ್ದರು. ರೇಣುಕಾಸ್ವಾಮಿ ಹಾಗೂ ಆತನನ್ನು
ಅಪಹರಣ ಮಾಡಿದ ಆರೋಪಿಗಳು ಇದೇ ಬಾರ್‌ನಲ್ಲಿ ಊಟ ಮಾಡಿದ್ದರಿಂದ, ಸಂದೀಪ್‌ ಈ ಕೇಸ್‌ನ ಪ್ರಮುಖ ಕಣ್ಣಾರೆ
ಕಂಡ ಸಾಕ್ಷಿಯಾಗಿದ್ದಾರೆ.

ವಿಶೇಷ ಸರ್ಕಾರಿ ಅಭಿಯೋಜಕರಾದ (SPP) ಪಿ.ಪ್ರಸನ್ನ ಕುಮಾರ್ ಅವರು ಸಂದೀಪ್ ಅವರನ್ನು ಮುಖ್ಯ ಪರೀಕ್ಷೆಗೆ
ಗುರಿಪಡಿಸಲು ಸಜ್ಜಾದರು. ಕಟಕಟೆಯಲ್ಲಿ ನಿಂತು ನ್ಯಾಯಾಲಯಕ್ಕೆ ಸತ್ಯವನ್ನೇ ನುಡಿಯುವುದಾಗಿ ಪ್ರಮಾಣ
ಮಾಡಿದ ತಕ್ಷಣವೇ ಸಂದೀಪ್, “ನಾನು ನ್ಯಾಯಾಲಯಕ್ಕೆ ಒಂದು ಮಹತ್ವದ ವಿಷಯವನ್ನು ತಿಳಿಸಲು ಬಯಸುತ್ತೇನೆ,
ಅದಕ್ಕೆ ಅನುಮತಿ ನೀಡಬೇಕು” ಎಂದು ನ್ಯಾಯಾಧೀಶರಲ್ಲಿ ಮನವಿ ಮಾಡಿದರು.

ನ್ಯಾಯಾಲಯವು ಅನುಮತಿ ನೀಡುತ್ತಿದ್ದಂತೆ ಸಾಕ್ಷಿ ಸಂದೀಪ್‌ ಅವರು ಆಕರ್ಷ್‌ ಎನ್ನುವ ವ್ಯಕ್ತಿಯ ಮೂಲಕ
ಕೆಲ ಅಪರಿಚಿತ ವ್ಯಕ್ತಿಗಳು ನನ್ನನ್ನು ದೂರವಾಣಿಯ ಮೂಲಕ ಸಂಪರ್ಕ ಮಾಡಿ, ಪ್ರಕರಣಕ್ಕೆ ಕುರಿತಂತೆ ನ್ಯಾಯಾಲಯಕ್ಕೆ
ನೀಡಲಿರುವ ಸಾಕ್ಷ್ಯದ ಹೇಳಿಕೆಯ ಮಾಹಿತಿಯನ್ನು ಕೇಳಿದ್ದು, ಅಲ್ಲದೇ ಸತ್ಯ ಮರೆಮಾಚಿ ಅವರಿಗೆ ಅನುಕೂಲವಾಗುವ
ರೀತಿಯಲ್ಲಿ ಸಾಕ್ಷಿ ನುಡಿಯಲು ಒತ್ತಡ ಹೇರಿರುವ ಕುರಿತು ಹೇಳಿದ್ದಾರೆ.

ಕೂಡಲೇ ನ್ಯಾಯಾಲಯದಲ್ಲಿ ಈ ಹೇಳಿಕೆಯಿಂದ ಸನ್ನಿವೇಶ ಗಂಭೀರಗೊಂಡು. ನ್ಯಾಯಾಧೀಶರು ಕೂಡಲೇ ಆದೇಶ ಬರೆಸಿದರು.
ನ್ಯಾಯಾಲಯವು ಈ ಪ್ರಕರಣಕ್ಕೆ ಸಂಬಂಧಿಸಿದ ಅಥವಾ ಸಂಬಂಧಪಡದ ಯಾವುದೇ ವ್ಯಕ್ತಿಯಾಗಲಿ ಸಾಕ್ಷ್ಯವನ್ನು
ನಾಶಪಡಿಸಲು ಅಥವಾ ತಿರುಚಲು ಯತ್ನ ಮಾಡಿದರೆ ನ್ಯಾಯಾಲಯವು ಕ್ಷಮಿಸುವುದಿಲ್ಲ. ಅಂತವರ ವಿರುದ್ಧ ಕಾನೂನು
ಕ್ರಮ ಜರುಗಿಸಲಾಗುವುದು ಎಂದು ಕಠಿಣ ಎಚ್ಚರಿಕೆ ನೀಡಿದರು.

ಒತ್ತಡದಲ್ಲಿದ್ದ ಸಾಕ್ಷಿಗೆ ನ್ಯಾಯಾಧೀಶರು ಮೌಖಿಕವಾಗಿ ಧೈರ್ಯ ತುಂಬಿದರು. ಅಲ್ಲದೆ ಸಂದೀಪ್‌ಗೆ ಪೊಲೀಸ್‌
ರಕ್ಷಣೆ ನೀಡುವಂತೆ ಕಟ್ಟುನಿಟ್ಟಿನ ಆದೇಶ ನೀಡಲಾಗಿದೆ. ಬುಧವಾರಕ್ಕೆ ವಿಚಾರಣೆ ಮುಂದೂಡಲ್ಪಟ್ಟಿದ್ದು,
ಆಕರ್ಷ್‌ ಹಾಗೂ ಆತನ ಹಿನ್ನೆಲೆಯಲ್ಲಿರುವ ಸೂತ್ರಧಾರಿಗಳ ವಿರುದ್ಧ ಪೊಲೀಸರು ಕಾನೂನು ರೀತಿ ತನಿಖೆ 
ಕ್ರಮ ಕೈಗೊಳ್ಳಲಿದ್ದಾರೆ.

Advertisement