ಮೊದಲೆಲ್ಲ ಪ್ರೀತಿ ಪ್ರೇಮಗಳಿಗೆ ತನ್ನದೇ ಆದ ಮಹತ್ವವಿತ್ತು. ತಾನು ಪ್ರೀತಿಸಿದವರ ಕೈಹಿಡಿದು ಅವರ ಕಷ್ಟ ಸುಖಗಳಿಗೆ ಆಗುತ್ತಾ ಬದುಕಿನುದ್ದಕ್ಕೂ ನೆಮ್ಮದಿಯಿಂದ ಇರಬೇಕು ಎಂಬ ಮನೋಭಾವ ಮೊದಲಿನವರಲ್ಲಿತ್ತು. ಆದರೆ ಇಂದು ಪ್ರೀತಿ -ಪ್ರೇಮಗಳೆಲ್ಲವೂ ಬರಿ ಬೂಟಾಟಿಕೆಯಾಗಿದೆ. ಯಾಕೆಂದರೆ ಪ್ರೇಮಿಸುವುದು ಎಂದರೆ ಇಂದು ಟೈಂಪಾಸ್ ಆಗಿಬಿಟ್ಟಿದೆ. ತನ್ನ ಸಂಗಾತಿ ಜೊತೆ ತಿಗಣೆ ರಕ್ತ ಹೀರುವಂತೆ ಹಣವನ್ನು ಪೀಕಿ ಬಿಸಾಕುವುದು ಅನೇಕರ ರೂಢಿಯಾಗಿ ಬಿಟ್ಟಿದೆ. ಇದೀಗ ಇಂಥದ್ದೇ ಒಂದು ಘಟನೆ ನಡೆದಿದ್ದು ಪ್ರೇಯಸಿ ಒಬ್ಬಳು ತನ್ನ ಪ್ರಿಯತಮನಿಗೆ ಸಕ್ಕತ್ ಆಗಿ ಯಾಮಾರಿಸಿದ್ದಾಳೆ.
ಹೌದು, ಮೂರು ವರ್ಷದಿಂದಲೂ ಪರಸ್ಪರ ಪ್ರೀತಿಸುತ್ತಿದ್ದ ಜೋಡಿಯೊಂದರ ಬಾಳಲ್ಲಿ ಇದೀಗ ಬಿರುಗಾಳಿ ಬೀಸಿದೆ. ಈ ಬಿರುಗಾಳಿಗೆ ಕಾರಣ ಪ್ರೇಯಸಿ. ಯಾಕೆಂದರೆ ತನ್ನ ಪ್ರಿಯತಮನಿಂದ ಬರೋಬ್ಬರಿ ಮೂರು ಲಕ್ಷ ರೂಪಾಯಿಯ ಗಿಫ್ಟ್ ಪಡೆದ ಮರುದಿನವೇ ಆಕೆ ಬ್ರೇಕ್ ಅಪ್ ಮಾಡಿಕೊಂಡು ಕೈ ಕೊಟ್ಟಿರುವ ವಿಲಕ್ಷಣ ಘಟನೆ ನಡೆದಿದೆ.
ಏನಿದು ಘಟನೆ?
ಯುವಕ ಮತ್ತು ಆತನ ಗರ್ಲ್ಫ್ರೆಂಡ್ ಕಳೆದ 3 ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಆಕೆಗೆ ಗೇಮಿಂಗ್ ಕಂಪ್ಯೂಟರ್ ಎಂದರೆ ತುಂಬಾ ಇಷ್ಟವಾಗಿತ್ತು. ಇದೇ ಕಾರಣಕ್ಕೆ ಯುವಕ ಆಕೆಯ ಹುಟ್ಟುಹಬ್ಬದ ದಿನ ಸುಮಾರು 3.1 ಲಕ್ಷ ರೂಪಾಯಿ (£2500) ಬೆಲೆಯ ದುಬಾರಿ ಗೇಮಿಂಗ್ ಪಿಸಿಯನ್ನು (Gaming PC) ಗಿಫ್ಟ್ ಆಗಿ ನೀಡಿದ್ದನು. ಆದರೆ, ಗಿಫ್ಟ್ ಸಿಕ್ಕ ಮರುದಿನವೇ ಆಕೆ ಬ್ರೇಕಪ್ ಹೇಳಿ ಆತನಿಗೆ ಶಾಕ್ ನೀಡಿದ್ದಾಳೆ. ಈ ವಿಚಾರವನ್ನು ಸ್ವತಹ ಯುವಕನೇ ರೆಡ್ಡಿಟ್ ಜಾಲತಾಣದಲ್ಲಿ ಹಂಚಿಕೊಂಡಿದ್ದು “ನನಗೆ ಬ್ರೇಕಪ್ ವಿಷಯ ಕೇಳಿ ತುಂಬಾ ಬೇಸರವಾಯಿತು. ಯಾರೂ ನನ್ನನ್ನು ಈ ರೀತಿ ಬಳಸಿಕೊಂಡಿರಲಿಲ್ಲ” ಅಂತ ತನ್ನ ಅಳಲು ತೋಡಿಕೊಂಡಿದ್ದಾನೆ.
ಆದರೆ ಶಾಕಿಂಗ್ ಸಂಗತಿ ಎಂದರೆ ನಂತರ ಆಕೆಯ ಸ್ನೇಹಿತರ ಮೂಲಕ ಯುವಕನಿಗೆ ಅಸಲಿ ವಿಷಯ ಗೊತ್ತಾಗಿದೆ. ಆಕೆ ಕಳೆದ ಕೆಲವು ತಿಂಗಳುಗಳಿಂದಲೇ ಬ್ರೇಕಪ್ ಮಾಡಿಕೊಳ್ಳಲು ಪ್ಲಾನ್ ಮಾಡಿದ್ದಳಂತೆ. ಆದರೆ ಈ ದುಬಾರಿ ಕಂಪ್ಯೂಟರ್ ಸಿಗಲಿ ಎಂದೇ ಕಾಯುತ್ತಿದ್ದಳು ಎಂಬ ರಹಸ್ಯ ವಾಟ್ಸಾಪ್ ಚಾಟ್ ಸ್ಕ್ರೀನ್ಶಾಟ್ಗಳ ಮೂಲಕ ಯುವಕನಿಗೆ ಸಿಕ್ಕಿದೆ.
ಅಂದ ಹಾಗೆ ಈ ಘಟನೆ ನಡೆದಿರುವುದು ಯುಕೆಯಲ್ಲಿ. ಯುಕೆಯ ಕಾನೂನಿನ ಪ್ರಕಾರ, ಒಮ್ಮೆ ಪ್ರೀತಿಯಿಂದ ಕೊಟ್ಟ ಗಿಫ್ಟ್ ಅನ್ನು ಮರಳಿ ಪಡೆಯಲು ಬರುವುದಿಲ್ಲ. ಅದು ಆ ಯುವತಿಯ ಸ್ವತ್ತಾಗಿರುತ್ತದೆ. ಆದರೆ, “ಆಕೆ ನನ್ನ ಗರ್ಲ್ಫ್ರೆಂಡ್ ಆಗಿಲ್ಲದೇ ಹೋಗಿದ್ದರೆ ನಾನು ಅಷ್ಟು ಹಣ ಖರ್ಚು ಮಾಡುತ್ತಿರಲಿಲ್ಲ. ಆಕೆ ಮೊದಲೇ ಪ್ಲಾನ್ ಮಾಡಿ ನನಗೆ ಮೋಸ ಮಾಡಿದ್ದಾಳೆ. ಹೀಗಾಗಿ ಆ ಕಂಪ್ಯೂಟರ್ ಅನ್ನು ವಾಪಸ್ ಪಡೆಯಲು ಬೇರೆನಾದರೂ ದಾರಿಯಿದೆಯೇ?” ಎಂದು ಯುವಕ ನೆಟ್ಟಿಗರ ಬಳಿ ಕಾನೂನು ಸಲಹೆ ಕೇಳಿದ್ದಾನೆ.